நெடுந்தீவு குதிரைகள் தொடர்பில் வனஜீவராசிகள் திணைக்களம் அக்கறை செலுத்த வேண்டும்

143

யாழ்ப்பாணம் – நெடுந்தீவு பகுதியில் உள்ள குதிரைகளைப் பராமரிக்க வேண்டிய, பாதுகாக்க வேண்டிய பொறுப்பு வனஜீவராசிகள் திணைக்களத்திற்கும் உள்ளதாக வடமாகாண முன்னாள் விவசாய அமைச்சர் பொன்னுத்துரை ஐங்கரநேசன் தெரிவித்துள்ளார்.

நெடுந்தீவு பகுதியில் குதிரைகள் இறப்பதனைத் தடுப்பதற்கான நடவடிக்கைகளை மேற்கொள்வது தொடர்பான வழிமுறைகளைக் கண்டறிவதற்கு, வடமாகாண முதலமைச்சரால் குழு ஒன்று நியமிக்கப்பட்டது.

முன்னாள் வடக்கு மாகாண விவசாய அமைச்சர் பொன்னுத்துரை ஐங்கரநேசன் தலைமையிலான குறித்த குழுவில், வடக்கு மாகாண சபை உறுப்பினர்களான விந்தன் கனகரத்தினம், வை.தவநாதன், பிராந்திய உள்ளூராட்சி உதவி ஆணையாளர், நெடுந்தீவு பிரதேச செயலர், நெடுந்தீவு பிரதேச சபை செயலாளர் ஆகியோர் உள்ளடங்குகின்றனர்.

இந்நிலையில் குறித்த குழுவினர் நெடுந்தீவு சென்று குதிரைகளின் வாழ்விடத்தைப் பார்வையிட்டதோடு, பிரதேச செயலகத்தில் கலந்துரையாடல் ஒன்றையும் நடாத்தியுள்ளனர்.

குறித்த கலந்துரையாடலில் குதிரைகளைப் பாதுகாத்தல், குதிரைகளுக்கு தேவையான உணவு, நீர் உள்ளிட்ட விடயங்கள் குறித்து கலந்துரையாடியுள்ளனர்.

இந்நிலையில் ஐங்கரநேசன் தலைமையிலான குழுவினர் நெடுந்தீவு குதிரைகளை பாதுகாப்பதற்கான தீர்வுத் திட்டங்களை உள்ளடக்கிய தமது அறிக்கையை இரண்டு வார காலத்தில் முதலமைச்சரிடம் சமர்ப்பிக்கவுள்ளதாக தெரிவித்துள்ளமை குறிப்பிடத்தக்கது.

நெடுந்தீவில் உயிருக்கு போராடும் விலங்கினங்கள்! நீருக்கு உதவ கைகொடுங்கள்!

வடபகுதியில் நிலவும் கடும் வறட்சி காரணமாக மனிதர் மட்டுமன்றி விலங்கினங்களும் பெரிதும் பாதிக்கப்பட்டுள்ளன.

இந்நிலையில் நெடுந்தீவின் வனாந்திர பகுதியில் உள்ள 500ற்கு மேற்பட்ட குதிரைகள் உள்ளிட்ட கால்நடைகள் நீரின்றி உயிரிழக்கும் அபாய நிலை ஏற்பட்டுள்ளது.

கடும் வறட்சி காரணமாக பாரம்பரியமிக்க குதிரை இனம் முற்றாக அழிந்து போகும் நிலைக்கு தள்ளப்பட்டுள்ளது.
advertisement

இவ்வாறான நெருக்கடி நிலையில், விலங்கினங்களை பாதுகாக்கும் நோக்கில் லங்காசிறி குழுமம் களத்தில் இறங்கியுள்ளது.

வறட்சி காரணமாக நீரின்றித் தவிக்கும் குதிரைகள் மற்றும் ஏனைய கால்நடைகளுக்கும் நீர் விநியோகம் செய்ய உதவி வழங்கியது.

அதன்படி முதற்கட்டமாக நெடுந்தீவு மேற்கு பகுதியில் கால்நடைகளுக்கு நீர் வழங்கும் செயற்பாடு ஆரம்பிக்கப்பட்டுள்ளது.

இந்தப் பணியினை தொடர்ந்து ஏழு நாட்களுக்கு முன்னெடுக்க லங்காசிறி குழுமம் நடவடிக்கை மேற்கொண்டுள்ளது.

இந்தப் பகுதியில் தொடர்ந்தும் வறட்சி நிலை நீடிப்பதால், விலங்கினங்களை காப்பாற்ற நீர் அவசியமாக உள்ளது.

இந்த அவல நிலையை உணர்ந்து தன்னார்ந்தவர்கள் உதவி செய்ய முன்வர வேண்டும். அதற்கான ஏற்பாடுகளை செய்ய அந்தப் பகுதியிலுள்ளவர்கள் தயாராக உள்ளனர்.

நெடுந்தீவு மேற்கு பகுதியிலுள்ள விலங்கினங்களுக்கு சுமார் ஐயாயிரம் லீற்றர் நீர் தேவைப்படுகிறது. இதற்கான செலவினம் 5000 ரூபாவாகும்.

விலங்கினங்களின் மீது அன்புள்ளவர்கள் முன்வந்து உதவிகளை செய்யுமாறு கோரப்பட்டுள்ளனர்.